- 681 -

1441. Dez. 28. Liegnitz.

Herzogin Elisabeth verkündet einen Urtheilsspruch der Mannen zu Donin in dem zwischen dem Rath von Liegnitz und Hannos Brauchatsch wegen der Stadthaide schwebenden Streite.

Wir Elysabeth von gotis genaden herczogynn in Slesien zcu Teschyn, frawe zcum Brige vnd zcu Lignicz bekennen offentlichen mit diesem briefe ken allen den, die en sehen, horen adir lesen, das von der sachin wegen vnserir stat Lignycz an eyme vnd Hannsen Brauchatschen vnd in vormundschafft seyner vettirn am andiren teile, der sy an vns noch schulde vnd antwurtt bekomen sind, mit irer beyder schuldt vnd antwurtt ken Donynn noch gewonheyt vnsir lande vmbe dirfrogunge rechtis vnd orteils dorubir geschickt haben, die vns denne in sulchem lawthe, als hernoch geschriben steth, von worte zcu worte sind eynkomen: Wir manschafft der Donyschen. pflegen synd in disen beygelegten vir schrifften vnd orteils frogen czweyer parteyen rechtis gefregitt, wye irir beydir teile schriffte in eren geseczen, dorinn die beygesatczten vorgesprochen orteil eygentlichen innen halden vnd zcu ende vszweysen vnd als wir in denselbigen beydir parteye vier schrifften bynnen korczir friste auch vormols vme recht gefrogit sein; hyruff sprechen wir obgenanthe mannen zcu Donyn das recht, als wir das vor-mols vff dieselbigen beyder parteye vier schaffte gesprochen haben vnd wissen is nicht bessir: Haben die sachen czwyschen der stat Lignicz vnd den Brawchattschern noch vorlawffenem orteile in entpfengkunge der vrsachen .also uff der irsten orteile vnd rechtis sproche vsweisunge in strebenden orteilen gehangen, vnd den Brawchatschern an eren geweheren, die en an irer freyheyt zcu folkomen in den vorgesprochen orteylen durch recht zcu folkomene zcudirkant vnd zcugesprochen ist, nicht broch wurden vnd dorczu in orteils falle nicht fellig georteilt weren, so weren die Brawchatscher noch des vorgesprochen orteils vsweysunge mit iren irteilten geweren, ab sy der zcu rechte fulqwemen erir angeerbten freyheyt noch ires eldisten vnd ires bestetigetten lehenbriefis vszweysung, der sy mit recht nye entwerett weren, nehir zcubehalden; wenn das sye, die rathmannen der stat Lignicz mit irem kawffe vnd jungsten lehenbriefe, die weyle den Brawchattschern ire gewehere nicht vorteilt noch gebrochen ist, dauon geweysen mochten, doruff auch Peter Brawchatsche in den vorgesprochen orteylen bey seynem eldisten furstelichem briefen zcubeleiben georteilt ist, doch also, das her des briefis vnd der orteil dorinne geschriben noch irem lauth vnd vszwysunge gebruche, hetten denn die Brawchatscher vbir den hewptbriefe vnd sundirlichen obir den artikel in disen worten geschreben: Dorczu vorleyhen wir dem vorgenanten Beln vnd seynen erben in vnserm walde, der genant ist Gola, vnd in allen vnsern weiden folle freyheyt in weyden vnd in holczirn zcu allen nuczen, hasen vnd rehere zcu fahen, vnd auch der artikel des aldin latinischen brifes; Concedimus insuper predicto Beln et suis heredibus etc In der stat Lignicz saczczunge vnd in Brawchatsch antwurtt diser irer vier schrifften der obenberurtten vordewtschunge gleich vbir eyne tragende sich der stat Lignicz freyheyt vnd eygenthumes in demselbigen walde, in weyden adir in holczirn vbir eynen sulchen artikel czu andirn nuczczen, der en der briefe vnd sunderlichen der artikel desselben briefis, doruff sy die sachen gründen nicht irlewbitt hette noch vszweysunge icht wedir recht vndirwunden, das sy bekenthen adir mit rechte von der stat vorwunnen wurden, des musten sy vorwandiln vnd dorumbe leiden, als vil, als recht ist, von rechtis wegen. Geben zcu Donyne am ffreytag noch Esto mihi vndir em Heynrichs von Bewnaw des hewptmanns ingesegill, des wir manschafft gebruchen. Des so haben wir czu irer bethe solich orteil vnd rechtis sproche vndir vnsirm ingesegill in disenn vnserm briefe gegeben, beschrebin vnd vorsigelt, an den wir zcu merer sichirheytt vnsir ingesegill haben lossen hengen, der gegeben ist zcu Legnicz an dem nechsten donerstag noch des heiligen Crists tag noch Cristi vnsirs herren gepurtt tawsent virhundirtt vnd dornoch in dem eynvndvirczigsten jore.

O. d. St. L. No. 373. Das Wappensiegel an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866